Kaliboan ka tawo misalmot sa Freedom Walk

CEBU, Philippines - Kaliboan ka tawo ang midagsa kagahapon sa Freedom Walk nga nagsugod sa Fuente Osmeña ug natapos sa Plaza Independencia agi og paghandom sa ika-29 ka tuig nga kasumaran sa kamatayon ni kanhi Senador Benigno “Ninoy” Aquino.

Ang maong kalihukan gitambongan sa mga empleyado sa City Hall, mga tinun-an, opisyales ug mga staff sa barangay, mga market vendor, ug uban pa. Matud pa ni Mayor Michael Rama kinsa mikuyog usab sa pasunding nga angayan gyud nga dili kalimtan sa katawhan ang mga kaayohan nga nahatag sa kanhi senador sa nasud.

Nagkanayon ang mayor nga angay gyud nga ipabilin sa publiko ang pagtamod sa demokrasya nga mao gyud ang nag-una nga adbokasiya ni Aquino.

Nagsul-ob og yellow nga mga sapot ang nanambong sa parade kagahapon nga nagdala usab og banner nga dunay hulagway sa kanhi senador. Sumala pa ni Rama nga gumikan sa kalampusan sa maong kalihukan, dako ang posibilidad nga himoon na matag tuig ang freedom walk, dinhi sa dakbayan sa Sugbo. (Sanden J. Anadia/WC) (BANAT)