Establisamento nga mopatukar og Binisaya adunay insentibo

CEBU, Philippines — Gihangop ni Konsehal Joel Garganera nga gipasar sa konseho sa Dakbayan sa Sugbo ang iyang gipangamahan nga Ordinance 2780 nga magpausbaw ug mapabuhi sa mga musikang Binisiya ug ipatukar sa mga lokal nga mga establisamento aron mapalambo ang kultura ug ekonomikanhong pagkatawo sa siyudad.

Matud ni Garganera nga lahi ang maong ordinansa gumikan kay wala kini penalty clause.

Apan adunay ihatag nga insentibo kong masunod sa mga nagkadaiyang establisamento sama sa malls, restaurant, hotel, merkado, terminals nga adunay 30 porsyento nga magpatukar og musikang Binisaya matag adlaw.

Usa sa mga gitan-aw nga insentibo nga madawat sa mga establisamento mao ang makunhoran ang bayranan sa buhis diin ikonsulta ug irekomendar pa kini sa City Treasurer’s Office.

“Gusto gyud nako nga masabtan gyud ilabi na sa mga stakeholders niining musikang Binisaya nga ang kaayohan nga mahatag niani dili lang kay mosunod lang sila, motuman lang sila tungod kay nahadlok sila nga naay penalty”, pasabo ni Garganera.

Niadtong Hunyo 25, 2025 gipasar sa konseho ang maong ordinansa diin naghuwat na lang kini og pirma sa mayor aron mag-umol na usab si Garganera og lagda ug regulasyon sulod sa tulo hangtud sa unom ka buwan aron nga hingpit kini nga mapatuman sa siyudad.

Tinguha usab sa maong ordinansa nga makamugna og “hyper-localized cultural experience” aron nga mapalambo ang turismo ug masuportahan ang lokal nga negosyo ug aron nga mas maila ang mga kanta nga ginama sa lokal nga mga musikero. — /BDB (BANAT NEWS)