OBO nigama og timeline sa ilang mga lakang batok sa fast food chain

CEBU, Philippines — Gipadayag sa Office of the Building Official (OBO) ang ilang timeline sa mga lihok batok sa usa ka fast food chain sa downtown sa Dakbayan sa Sugbo.

Matud sa OBO nga ang sunod nga lihok kabahin sa maong isyu anaa na karon sa buhatan sa mayor ug sa City Legal Office (CLO).

Base sa sulat nga gipadala sa konseho nga pinirmahan ni Architect Florante Catalan, hepe sa OBO ilang giklaro ang mga lakang nga ilang gihimo human sa public hearing niadtong Hunyo 11, 2025. Nahisgutan sa maong hearing ang estraktura sa fast food chain nga nahimutang sa eskina sa Osmeña Boulevard ug F. Gonzales Street, Barangay Santo Niño niining siyudad.

Matud sa OBO nga nakadawat sila og aplikasyon alang sa renovation sa maong building niadtong Marso 23, 2018.

Apan human sa ilang evaluation ilaha kining gibalik sa tag-iya niadtong Abril 11, 2018 tungod sa mga kakulangan nga kinahanglan pa og tubag.

Gi-resubmit kini niadtong Abril 20 ug Nobyembre 22, 2018 apan gibalik na usab niadtong Hulyo 13 ug Disyembre 10 sa parehong tuig tungod gihapon sa parehong rason.

Gikataho nga dihang nagproseso pa ang OBO sa maong aplikasyon nag-isyu sila og tulo ka notices of illegal construction penetsahan niadtog Mayo 29, Hunyo 19, ug Hulyo 3, 2018.

Gawas niini, nakapadala usab ang OBO og subpoena nga adunay hearing nga gitakda sa Oktubre 3, 2018.

“However, there is no documentation to confirm that the hearing occurred, as the attendance sheet contains no names or signatures”, tipik sa sulat. Gibutyag sa OBO nga nahitabo kini sa niaging administrasyon ug wala maglakip sa kasamtangang opisyales, division heads, ug inspectors ilawom sa pagpangulo ni Catalan.

Niadtong Oktubre 4, 2019, nakapadala usab og notice of illegal construction ang OBO.

Pagka-Oktubre 17, 2019 nakadawat usab sila og reklamo pinaagi sa Public Information Office sa buhatan sa mayor.

Gikataho nga niadtong Oktubre 14, 2020 giendorso na nila ang kaso ngadto sa CLO alang sa pagpasaka og legal nga lihok sa kalapasan sa Presidential Decree No. 1096 kun “National Building Code of the Philippines”. — /BDB (BANAT NEWS)