Nagkugos sa apo, gipusil sa ulo patay

CEBU, Philippines — Patay ang usa ka 42-anyos nga lakaki human kini gipusil diha sa Purok 7, F. Ligason Street, Barangay Bool sa Tagbilaran City alas-7:10 kagahapon sa buntag adlaw nga Sabado, Hunyo 28, 2025, swerte nga wala maamong ang gikugos nga duha pa ka semana niini nga apo.

Ang mayor sa Dakbayan sa Tagbilaran Jane Yap, miisp sa maong insidente nga ‘isolated case’ ug padayon karon ang gihimo nga hot pursuit operation sa kapulisan.

Gimandu niya sa hepe sa Kapulisan Police Lt. Col John Escobar nga hatagan gilayon ug dinalian nga sulbad ang maong insidente.

Ang biktima mao si Rodelito Tanyo, taga Toledo City apan kasamtangan naa karon anaa sa Barangay Bool. Ang suspetsado duha ka mga lalaking nagmotor nga naka-helmet ug naka bonnet.

Human sa insidente sa pagpamusil dali silang nakasibat padulong sa Barangay Dampas pagawas na sa Tagbilaran City.

Base sa inisyal nga pakisusi sa kapulisan giingong naghupot ang biktima sa iyang apo nga naglingkod sa maong dapit sa dihang niabot ang mga gunmen ug nangutana apan kalit nga gipusil diha sa ulo ang biktima.

Ang biktima patay diha-diha dayon ug swerte nga wala maangin ang iyang apo ug wala kini maigo.

Sa social media post ni Yap nipagawas siya og mga hulagway sa mga gunmen ug nihangyo sa katawhan nga kung adunay nakaila o makahatag og information nga itawag dayon sa 911 Tagbilaran Emergency Hotline o sa pinakaduol nga police station aron matabangan ang kapulisan nga masulbad ang insidente ug mahatagan usab og hustisya ang biktima.

Ang mayor kinasingkasing usab nga nipaabot sa iyang pahasubo ngadto sa pamilya sa biktima.

Ang kapulisan blangko pa karon sa motibo sa pagpusil patay sa biktima.