'Foreman' nga nadakpan sa PDEA dili sakop sa Carmen Copper Corporation

CEBU, Philippines - Gihimakak sa Carmen Copper Corporation nga ilahang trabahante ang usa ka foreman nga nasikop sa buy bust operation sa Philippine Drug Enforcement Agency (PDEA)-7 niadtong Biyernes sa gabii sa nakalabay’ng semana diha sa sitio DAS, barangay Lutopan, dakbayan sa Toledo.

Si Pedro Tuason, Human Resource Management Department Head sa CCC nagkanayon nga ang suspetsadong si Erlie Eric Cantalajo, 42, dili empleyado sa ilang kompanya. Kahinumduman nga si Jessie Tabanao tigpamaba sa PDEA nagkanayon nga si Cantalajo kinsa suspetsadong pusher og shabu miingon nga foreman o kapatas diha sa CCC ang suspek ug lakip sa mga mamalit og shabu niini mga kawani sa maong minahan.

Apan sa gipadalang pamahayag sa CCC sa Banat News ilang giklaro nga dili konektado sa ilang kompanya ang suspek ug wala usab maberipika ang pamahayag ni Tabanao sa alegasyon ni Cantalajo nga mga trabahante sa maong minahan ang uban sa iyang mga customer. Giklaro sa CCC nga ‘drug free’ ang ilang kompanya.

“Our company is a drug-free workplace. We are committed to safeguard the welfare of the employees from the harmful effects of dangerous drugs and we maintained a working environment supportive of the dignity and self-esteem of individuals. As company policy, we have intensified our campaign to eliminate drug menace in the society,” tipik sa pamahayag ni Tuason.

Si Cantalajo dugay nang gipanid-an sa PDEA human sila makadawat og report kabahin sa pagpamaligya niini og shabu sa maong dapit hinungdan sa gilusad nga operasyon.

Nasuta sa Banat News gikan kang Tabanao nga si Cantalajo foreman sa usa ka contractor nga nagtrabaho diha sa CCC. (BANAT NEWS)