Pagpanunggab sa Lapu-Lapu giimbestigar pa sa kapolisan

CEBU, Philippines — Padayon nga gilihok sa kapolisan sa Presinto 3 sa Lapu-Lapu City Police Office (LCPO) ang pag-ila sa duha ka mga lalaki nga responsable sa nahitabong pagpanunggab sa Barangay Calawisan siyudad sa Lapu-Lapu.

Suma pa ni Police Captain Edcel Petecio, chief sa Lapu-Lapu City Police Office Public Information Office nga ang biktima giingong naglakaw pauli sa ilang panimalay alas otso pasado sa miaging gabii dihang gisundan og duha ka lalake nga nagsakay og motor ug kalit nga gidunggab.

Dali nga misibat ang duha nga nagmotor ug ang biktima nakabaton og mga samad dinunggaban sa iyang kalawasan hinuon nakapangayo pa kini og tabang sa iyang pamilya ug gidala sa Lapu-Lapu City District Hospital.

Apan human sa paghatag og pasiuna nga pagtambal gibalhin kini ngadto sa Vicente Sotto Memorial Medical Center sa siyudad sa Sugbo.

Si Petecio miingon nga sayo sa pagsugat sa Bag-ong Tuig ang biktima adunay gisita nga lalaki nga nasigpatan niini ug gidudahan nga asset sa polis nga nagbalikbalik sa maong dapit nga nagsakay og motorsiklo. Dugang pa ni Petecio nga usa sa mga molopyo sa maong dapit ang mibadlong sa pagsita sa biktima ug miangkon kini nga kaila niya ang maong lalaki tungod kay kustomer kini niya   sa gibaligya niining paboto.