Batang trabahador nagkadaghan

CEBU, Philippines -  Makaalarma na sumala pa sa usa ka labor group ang nagkadaghang kaso sa child labor sa nasud nga miabot na sa 5.59 milyones ka mga batang Filipino base sa uwahing survey nga gihimo sa Survey on Children and Child Labor sa National Statistics Office.

Si Trade Union Congress Party (TUCP Party-List) Rep. Raymond Democrito Mendoza miingon nga makaalarma na ang nagkataas nga kaso sa child labor sa nasud ug matud pa niya dako kini og epekto sa kinabuhi sa kabataan ug sa mosunod nga henerasyon. Matud pa sa TUCP ang nakapasamot sa ilang kabalaka mao nga mayoriya sa maong mga batang trabahante nabutang sa mga peligrosong trabaho.

Base sa NSO report, mas taas ang maong gidaghanon komparar sa nakalabay’ng 2001 report nga 4 milyones lamang ka mga batang trabahante.

Matud pang Mendoza angayang doblehon pa sa gobiyerno ug ang ubang stakeholders ang ilang mga kampanya ug paghimo og mga lakang nga mahunong kini.

Dugang pa niya nga uyon usab ang TUCP sa sugyot sa International Labor Organization (ILO) nga kanunayon ang pag-monitor sa mga insidente sa child labor aron masukod kung epektibo ba ang mga lakang nga gihimo sa gobiyerno. (BANAT NEWS)