Kadalanan sa 10 ka brgy. gisubhan ni Rama

CEBU, Philippines - Human nasubhan ang mga nagkadaiyang kadalanan sa napulo ka mga barangay sa siyudad sa Sugbu kagahapon gipasalig ni Mayor Michael Rama nga doblehon pa ang budget alang niini aron mapaayo pa ang mga kadalanan sa ubang barangay.

Sumala pa ni Rama nga bisan sa kagamay nga budget alang sa pagpaayo sa kadalanan, dili kini mahimong babag sa iyang mga proyekto.

Kahinumduman nga P400 milyones ang gidusong budget ni Rama alang sa pagpaayo sa mga guba nga kadalanan sa siyudad apan ang giaprobahan sa konseho moabot lang ngadto sa P100 milyones.

Tungod niini gihatagan og prayoridad ni Rama kadtong mga kadalanan sa kabukiran sanglit maglisod na og agi ang mga residente sa maong dapit ilabi kung maglain ang panahon.

Kagahapon gilibot ni Rama ang nagkadaiyang road projects diha sa barangay Buhisan, Toong, Kalunasan , Pamutan, Apas, Pit-os Binaliw, Agsungot, Guba ug Sirao.

Namatikdang walay kaubang sakop sa “Team Rama” nga lineup ni Rama sa 2013 elections apan si Rama mipasabot nga gihimo niya kini aron dili madudahang namolitika.

Ang mga proyektong nahuman sa nahisgutan nga mga barangay naglangkob sa drainage system, ug road concreting nga mobalor ngadto sa P27 milyones.  (BANAT NEWS)