Direct flight gitinguha sa mga sakop sa EATOF

CEBU, Philippines —  Gitinguha karon sa mga miyembro nga probinsiya sa East Asia Inter-Regional Tourism Federation (EATOF) nga makaestablisar og direct flights gikan sa tagsa tagsa niini ka mga Probinsya ngadto sa laing probinsya nga miyembro sa pederasyon.

Usa sa nahisgotan atol sa Standing Committee Meeting sa EATOF niadtong Hulyo 21 hangtod 23 mao ang pagkonektar sa mga member-provinces pinaagi sa mga direct flights.

Ang EATOF gilangkoban og 10 ka mga probinsya gikan sa 10 ka mga nasud sa Asia, sama sa Cebu (Philippines), Gangwon (Korea), Jilin (China), Luang Prabang (Laos), Quang Ninh (Vietnam), Sarawak (Malaysia), Siem Reap (Cambodia), Tottori (Japan), Tuv (Mongolia), ug Yogyakarta (Indonesia). 

"Ang atong gi negotiate karon is naay direct flights from their country to ours para to bring more tourists" matud ni Gobernador Pamela Baricuatro.

Sumala ni Rowena Montecillo ang Provincial Tourism Officer nga sa pagkakaron wala pay direct flight gikan sa Sugbo padulong sa mga probinsya nga membro sa EATOF.

"So usually ang atong connectivity naa gyud sa mga capital, like Seoul sa South Korea, but ang member province sa EATOF is Gangwon" matud ni Montecillo.

Ang Secretary-General sa Gangwon Province nga si Kim Kweon-Jong una ng misugyot atol sa iyang courtesy call kang Baricuatro niadtong Hulyo 23 nga mag-establisar og direct flight gikan sa Gangwon padulong sa Sugbo, aron mapahingosgan ang tourism ties ug mapalambo ang bilateral cooperation.

Iyang gidapit si Baricuatro ug ang delegasyon sa Sugbo nga motambong sa Autumn Event sa Gangwon karong Oktubre 23-26.

Si Montecillo nagkanayon nga importante nga mapahingosgan ang "connectivity" sa Probinsya sa Sugbo uban sa mga miyembro nga probinsya sa EATOF, aron mapalapdan ang market sa Sugbo ug modaghan pa ang turista. Sama sa Gangwon nga usa ka probinsya sa South Korea, ug ang mga Koreano maoy numero unong market sa Probinsya sa Sugbo pag-abot sa turismo.

Matud ni Montecillo, ang Provincial Tourism Office padayon usab sa pagpangita og paagi aron makadani pa og mga turista dili lang ang mga top markets apil na ang emerging markets sa Probinsya sa Sugbo gikan sa ubang nasud.