Gidungog nga "bagsik" gi-ambusan

CEBU, Philippines - Gidungog nga bugoy ug bagsik sa lungsod sa Alcantara ang talandugon ang kahimtang human gi-ambusan samtang naglakaw sa bukirang bahin sa barangay Mangga sa maong lungsod alas 9:00 sa gabii niadtong Martes.

Ang biktima mao si Amancio Quimundo, 39, way klarong trabaho ug nagpuyo sa maong lugar nga giingong “bugoy-bugoy” ug bagsik sa maong lugar ilabi na kun kini makainom matud pa sa kapolisan.

Matud ni PO3 Ryan Tonelon sa Alcantara Police Station dihang nahinabi sa Banat News nag-uban ang biktima ug usa ka babayeng gituohang iyang asawa gikan sa pinuy-anan sa ilang ig-agaw nga si Cerilino Relacion Jr. aron sa pagpamalit og sud-an.

Samtang namauli na ang duha kalit lang silang gipusil makadaghang higayon, bugtong ang biktima lang ang naigo samtang nakadagan ang babayeng kauban niini.

Ang biktima naigo sa tiyan ug sa walang bahin sa paa ug nadala sa Badian District Hospital apan gibalhin sa Vicente Sotto Memorial Medical Center.

Padayon pa ang kapolisan sa imbestigasyon sa maong kaso ingon man sa pagpangita sa wala pa mailhing gikatahapan. BANAT NEWS