Kanhi polis gidakop kay wala motambong sa husay sa kaso

CEBU, Philippines - Kanhi polis nga nadestino sa kwerpo sa kapolisan sa lungsod sa Carmen ang gipadakop sa hukmanan gumikan kay wala na kini motambong sa husay sa kaso nga iyang giatubang.

Ang gidakop ug natanggong karon sa bilangguan sa lungsod sa Carmen giila nga usa ka Jesus Sayson, nga molupyo sa Barangay Baring sa maong lungsod.

Si Sayson gidakop sa kapolisan sa lungsod sa Carmen basi sa bench warrant nga giluwatan ni Maghuhukom Sylva Aquirre Paderanga, ang Assisting Judge sa Regional Trial Court Branch 25 sa Dakbayan sa Danao.

Gireklamo si Sayson sa usa ka Felicano Arriola nga molupyo sa Nivel Hills sa Lahug sa Dakbayan sa Sugbo nga kanhi usab polis nga nadestino sa Dakbayan sa Sugbo.

Si Arriola misang-at og reklamo ni Sayson gumikan sa kapakyas niini sa pagbayad sa gihulamang kwarta nga moabot sa P126 mil nga giingong gipalit niini og mga alahas ug uban pang kagamitan.

Makadaghan na nga higayon nga si Arriola midemanda ni Sayson nga bayran apan wala kini mobayad hinungdan nga misang-at kini og reklamo sa korte.

Unang gidakop si Sayson niadtong buwan sa Pebrero apan nakabutang kini og piyansa alang sa iyang temporaryong kagawasan.

Apan wala kini motambong sa husay na sa iyang kaso hinungdan nga gipadakop kini sa korte. Si Sayson gitanggong karon sa bilangguan sa lungsod sa Carmen. (BANAT NEWS)