Policewoman nga nakapusil og 'tulisan' gipasidunggan

CEBU, Philippines - Gipasidunggan sa Police Regional Office-7 kagahapon sa buntag human sa flag raising ceremony ang policewoman nga nakapusil patay og gidudahang tulisan sa miaging semana diha sa dalan M. Velez St., sa barangay Guadalupe ning siyudad sa Sugbu.

Si PO2 Lea Juarez sakop sa Provincial Intelligence Branch (PIB) sa Cebu Provincial Police Office (CPPO) ug PO2 Percival Perigo (dili PO1 ang ranggo sama sa nabalita sa miaging semana) gihatagan og pasidungog nga Medalya ng Kagalingan ni PRO-7 Chief Supt. Marcelo Garbo.

Gawas sa pasidungog si Juarez nakadawat usab og P10 mil nga cash incentive gikan sa PRO-7.

Si Garbo nagkanayon nga unta ang award ni Juarez ug Perigo nga himuong sumbanan ug ehemplo sa ubang mga Police Non-Commission Officer (PNCO) nga bisan kun off-duty moresponde kung gikinahanglan.

Kahinumduman sa miaging semana si Juarez ug Perigo gikan mitambong og court hearing sa drugas dihang nakabantay sa nahitabong pagpanulis diha sa Cebu Business Park ug daling miresponde.

Ang ginukdanay sa motorsiklo naabot sa Capitol Building hangtud nga naabtan ang duha ka mga tulisan apan ang usa nga 17-anyos giingong misukol gamit ang kalibre.45 hinungdan nga kini napusilan ni Juarez ug namatay. (BANAT NEWS)