Naninda’g panari, gipaulanan og balay patay

CEBU, Philippines — Patay ang usa ka mamaligyaay og manok igtatari ang gipusil patay sa wala mailhing tawo diha sa Barangay Mantalongon, Lungsod sa Barili kagahapon sa kaadlawon.

Ang biktima giila nga si Feliciano Dacuma Digamos, 52, residente sa Brgy. Kawasan, Lungsod sa Aloguinsan.

Wala pa mailhi sa kapolisan kun kinsa ang mamumuno nga nagtaptap sa iyang nawong ug nagsuot og itom nga jacket, karsones  ug kawo kinsa daling nisibat human sa pagpamusil.

Ang Barili Municipal Police Station, pinangulohan ni PSMS Marianito Morales ubos sa pagdumala ni P/Captain Jan Ace Elcid P. Layug, Officer-in-Charge nisusi sa lugar ug nakita nga nagbuy-od na sa dalan ang biktima ug wala nay kinabuhi.

Sa inisyal nga imbestigasyon sa kapolisan ang biktima nangandam sa pagpamaligya og manok nga pangsabong diha sa merkado sa nahisgutang barangay anang tungora.

Samtang nagpaabot sa mga kustomer kalit niabot ang mamumuno ug walay daghang estorya gipaulanan kini og bala.

Si Digamos  naigo sa dughan, ulo, ug wala nga dunggan hinungdan sa iyang hinanaling kamatayon.

Human sa pagpamusil daling misibat ang suspek sakay sa itom nga Honda XRM nga gimaneho og wala sab mailhing tawo paingon sa direksyon sa lungsod sa Aloguinsan.

Ang SOCO Carcar City Forensic team, pinangulohan ni PCMS Loreto Rama nakarekober og pito ka basiyo sa bala ug duha ka slugs sa crime scene. Padayon pa ang kapolisan sa ilang imbestigasyon bahin sa maong krimen. — John Geron Encabo (BANAT NEWS)