QR code system sa Kapitolyo himuong modelo sa LGUs lukop nasud

CEBU, Philippines — Himuong modelo sa Department of Social Welfare and Development (DSWD) ang QR code nga sestema sa Probinsiya sa Sugbo sa paghatag og hinabang ug serbisyo ngadto sa mga beneficiary niini.

Si Secretary Rex Gatchalian sa DSWD nagkanayon nga plano nila nga himuong sumbanan sa ubang mga local government unit lukop nasud ang maong sestema sa Probinsiya sa Sugbo kabahin sa paghatag og serbisyo sa ahensiya.

“We want to copy it and replicate it in other provinces to emulate. Other province’s coming to the office would ask for assistance and what we would do is to tell them to copy the Cebuano model of Governor Gwen in delivering social welfare. It is progressive, it’s pioneering and out of the box solution”, matud ni Gatchalian atol sa gihimong press conference niini uban ni Garcia human sila nagpinirmahanay og kasabotan alang sa pagpatuman og QR code system sa Assistance to Individuals in Crisis Situation (AICS) program sa mga persons with disability (PWD).

Ubos sa QR code nga sestema ang beneficiary hatagan og digitalized nga card nga maoy magamit sa pagdawat sa hinabang.

Ang maong nakonsepto niadtong tuig 2020 sa Probinsiya sa Sugbo tumong niini ang paghatag og tabang sa mga Sugboanong nawad-an og trabaho o negosyo tungod sa pandemiya sa COVID-19.

Ang maong sestema nagamit usab sa Sugbo Negosyo nga programa sa Kapitolyo ug sa Dasig Sugbo program niini.

Gihulagway ni Gatchalian nga “graft-free, efficient ug empowering” ang maong sestema nga angayan mahimong sumbanan sa ubang LGUs.

Alang sa pasiunang pag-apod-apod sa food stamp program sa DSWD ngadto sa  300, 000 ka beneficiaries niini ang digital card nga adunay sulod nga P3,500 (sulod sa pito ka bulan) mamahimong magamit sa beneficiaries pagpalit og mga gikinahanglan pinaagi sa mga partner merchants o tindahan lakip na sa Kadiwa ng Pangulo nga mga tindahan.

Samtang si Garcia nianunsiyo usab nga adunay P3 milyones nga tabang ang Kapitolyo isip counterpart aron hingpit nga mapatuman ang maong programa sa national. (BANAT NEWS)