May 16

CEBU, Philippines - 1571—Miabot ang Espanyol nga conquestador nga si Miguel Lopez de Legaspi nga gitawag kaniadto og El Adelantado sa Manila. Niadtong 1564, si López de Legazpi gimandoan sa Viceroy sa Espanya nga si Luis de Velasco aron pangulohan ang ekspedisyon sa Pasipiko aron pangitaon ang mga islang unang nadiskobrehan nila ni Ferdinand Magellan ug Ruy Lopez de Villabos nga unang miabot dinhi niadtong 1521 ug 1543. Ang eskpedisyon kaniadto gimando sa hari sa Espanya nga si King Philip II, diin ang pangalan nga ‘Pilipinas’ gikuha. Si Ruy López de Villalobos maoy mipangalan sa maong mga isla nga Pilipinas.

1845 – Gipanganak si Ilya Ilyich Mechnikov. Siya ang Russian microbiologist nga usa sa nakabahin sa 1908 Nobel Prize in Medicine uban ni Paul Ehrich tungod sa ilang panukiduki bahin sa immune system. Nadiskubrehan ni Mechnikov ang phagocytosis, ang abilidad sa cell nga maka- absorb og mga solidong butang pinaagi sa cell wall. Tungod sa maong nadiskubrehan migawas ang teyoriyang ang white blood cells kayang mopatay og mga makadaot nga kagaw pinaagi sa pag-absorb kanila.

1969 – Mitugpa ang Venera 5 sa planetang Venus nga usa ka space probe (susama ra og robot) nga gipadala sa Russia (Soviet). Malampuson kini sa pag-abot ug nakapadala dayon og mga impormasyon bahin sa Venus balik sa Earth apan tungod sa grabeng pressure sa kawanangan sa Venus nahagsa kini.

1975 – Unang nakasaka ang usa ka babaye sa summit sa Mount Everest nga si Japanese mountain climber Junko Tabei. BANAT NEWS