Villarante naniid sa lihok sa gobiyerno sa Talisay

CEBU, Philippines - Si Konsehal Romeo Villarante sa dakbayan sa Talisay naniid karon kun unsay buhaton sa mga dagkong opisyal sa kagamhanan sa maong dakbayan sa merkado publiko sa Tabunok nga gipasirhan.

Si Villarante kinsa usa ka oposisyon ug walay labot sa administrasyon ug pagdumala sa Talisay nasayud nga usa ka pamolitika ang pagpatak-op sa maong merkado busa angay magmabinantayon ang kagamhanan sa maong dakbayan sa ilang planong buhaton niini.

Matud ni Villarante nga posibleng ibaligya sa kagamhanan sa dakbayan ang luna sa maong merkado   ngadto sa usa ka private firm aron tukoran og shopping mall.

Alang kaniya gusto gyud niyang pabalikon ang mga vendor sa maong merkado kay nahisama nalang kini karon sa usa ka white elephant nga walay gamit.

Matud niya nga kun wala pa kini tak-opi   magamit pa unta kini sa mga vendor ug traysikol. Ang maong merkado publiko gisirad-an niadtong Agusto sa miaging tuig ug gibalhin ang  mga vendor didto sa bag-ong merkado publiko sa barangay Lagtang.

Bahin sa sugyot ni Villarante nga pabuksan pagbalik ang merkado sa Tabunok, ang tubag ni Talisay City Administrator Richel Bacaltos mao nga wala pay plano silang mga kadagkoan sa kagamhanan bahin sa maong merkado.  (BANAT NEWS)