19-anyos 'napusilan' sulod sa lawak sa 41-anyos nga uyab

CEBU, Philippines - Patay diha dayon ang usa ka babayeng tinun-an sa kolehiyo human gipusil sa iyang karelasyon sulod sa kwartong gipuy-an pasado alas-8 sa miaging gabii diha sa sitio Laguna II sa barangay Cogon Pardo ning dakbayana sa Sugbu.

Ang biktima giila sa kapulisan nga mao si Mary Luz Candoli,19, first year college sa kursong Hotel Restaurant and Management (HRM) sa usa ka inilang unibersidad dinhi sa dakbayan.

Samtang gipangita pa sa kapolisan ang giingong karelasyon sa biktima nga si Julito Ponce,41, plumber, residente sa sitio Romblon sa barangay Inayawan ug tag-iya og internitan nga mao say gipuy-an sa babaye diha sa maong lugar.

Si Candoli nakaangkon og usa ka samad pinusilan sa dughan ug milapos ang bala sa bukobuko, patay kini diha dayon.

Gisuta pa karon sa kapulisan kun gituyo ang pagpusil patay ang biktima sanglit ang kauban niini niadtong higayona sulod sa kuwarto mao man ang iyang karelasyon nga si Ponce .

Si Jeremias Zapanta,25, caretaker sa internet café nga gipanag-iya sa suspek mitug-an sa kapulisan nga usa ka oras sa wala pa mahitabo ang insidente, nagdungan nga niabot sa ilang gipuy-an si Candoli ug Ponce.

Sa imbestigasyon sa Homicide Section sa Cebu City Police Office (CCPO) nga mihatag pa ang suspek sa sweldo sa iyang tigbantay sa internetan nga si Zapanta.

Dangtan pila ka minutos ang nakalabay nagdungan usab og saka sa 2nd floor sila si Candoli ug Ponce apan wala magdugay, nadungog nila ang usa ka buto sa armas ug nangayo na og tabang ang biktima.

Sa ilang pagsaka naabtan na nila ang biktima nga nagkulob ug wala nay kinabuhi samtang ang iyang karelasyon nga si Ponce daling misibat.

Nakuha sa kapulisan ang usa ka .45 nga kalibre sa armas, upat ka bala sulod sa magazine niini ug usa ka slug sa crime scene. Nahibaw-an nga walay nadunggan nga kasikas o nag-away sila si Candoli ug Ponce nga nadunggan ang tigbantay nga si Zapanta.

Si PO1 Esmer Escultor sa Homicide Section miingon nga ila karung gisubay ang motibo sa selos sanglit giingong adunay ka chat ang biktima.

Matud ni Escultor nga nakakuha sila og impormasyon nga miingon ang suspek nga naghikog ang biktima pinaagi sa pagpusil niini sa kaugalingon apan ang nakapahibulong sa mga imbestigador mao ang pagsibat niini human sa maong hitabo.

Gikatakdang ipaubos sa autopsiya ang patay’ng lawas sa biktima pagtino kun tinuyo ang pagpusil o dili sa biktima.  (BANATNEWS)