Balay gidaoban sa igsoon sa tag-iya

CEBU, Philippines - Diriyot maugdaw ang usa ka vacation house nga gidaoban sa igsuon sa tag-iya niini didto sa lungsod sa Dumanjug kagahapon sa alas 6:00   pasado sa buntag.

Ang dos andanas nga balay nga hapit maabo sa hingpit gipanag-iya ni Cristina Zulueta Nicole, hingkod, nga tua magtrabaho sa Italy.

Samtang ang gitumbok nga misunog sa maong balay mao si Joel Vicente Zulueta, igsoon ni Cristina.

Sa pakighinabi sa Banat News ni SPO1 Joselito Abella, sa Dumanjug Police Station kini nagkanayon nga ang suspetsado didto moagi sa atop ug sa dihang nakasulod na kini gigamit niya ang gasolina nga iyang dala ug gisabyag sa atop dayon gidusliban pinaagi sa pana kansang baluong gihumol sa gasolina ug gidagkotan dayong pana   sa atop sa balay.

Maayo nalang kay abtik kaayo ang mga bombero sa lungsod, dali nga natabang ang kayo busa wala mahurot og kaugdaw ang tibuok balay.

Gani matud pa ni Abella nga mokabat lang sa P150mil ang kadaot sa balay nga nasunog.

Samtang naabtan sa kapolisan ang suspetsado nga naggunit pa og Indian pana ug botelya sa gasolina nga iduslib pa unta niya og tiwas sa balay.

Matud pa ni Abella nga sa diha nga sikopon na unta ang suspetsado gikatahong misukol kini sa kapolisan ug gilabay niini sa botelyang may gasolina ang mga polis nga midakop kaniya ug maayo nalang kay wala maigo ang polis.

Ang suspetsado kinsa nagpunay pa og yawyaw samtang giposasan mitug-an nga naglagot siya sa iyang igsoon kay P2,500 ray kuwartang gipadala kaniya.

Apan dili lang kay kuwarta ang hinungdan , kay matud pa ni Abella nasayran nila gikan sa mga silingan nga puwerti diay kunong kusoga mogamit og shabu sa suspetsado.

Midugang si Abella nga giandam na ang kaso     nga ipasaka sa tag-iya sa balay nga gidaoban batok   sa suspetsado kinsa nagkagulkol na karon sa prisohan. (BANAT NEWS)