Garcia posibleng modagan sa pagkasenador

CEBU, Philippines - Bukas sa posibilidad nga modagan ang inahan sa lalawigan sa Sugbo Gov. Gwendolyn Garcia sa pagka-senador sa umaabot 2013 election kini human niya nadawat ang report nga nahimutang sa ika-45 nga may dakong posibilidad nga mokandidato pagka-senador base sa Pulse Asia Survey nga gipagawas sa miaging adlaw.

Sa report sa Balitang Bisdak, ang gobernadora mipadayag sa iyang kalipay nga gibati tungod sa maong survey. “It was flattering to have been included to that survey,” malipayon nga gibutyag ni Garcia kinsa midugang nga sa 100 ka mga personalidad nga mas ilado pa kaysa kaniya nabutang siya sa maong pwesto(ika-45).

Mibutyag ang gobernadora nga abli siya sa mga posibilidad apan depende sa kahigayonan sa umaabot 2013 election.

Gihulagway hinuon sa gobernadora nga dili pa siya makadesider sa pagkakaron kabahin niini apan aduna siyay gisunod nga direksyon inubanan sa giya gikan sa Labawng’ Makagagahom.

“I’m keeping the options open. The directions that we take must be guided by the Lord Almighty,” matud pa sa gobernadora.

Base sa Pulse Asia Survey mas milabaw pa si Garcia sa mga sikat nga politiko sa kaulohan.

Nasayran nga mao nalang kini ang katapusan nga termino ni Garcia isip gobernadora sa lalawigan sa Sugbo.

Ang One Cebu Party nakugang usab sa gipagawas nga resulta sa survey apan ila usab kini nga gikalipay.(/EIM) - (BANAT NEWS)