Kaso sa 8 ipasaka sa liwas sa adlaw sa minatay

CEBU, Philippines - Hingpit na nga kapasakaan og kaso sa liwas sa adlaw sa minatay ang 18 ka mga dinakpan sa paggamit og pinaugang dahon sa marijuana sa purok Limonsito sa barangay Umapad, dakbayan sa Mandaue.

Si PO1 Melvin Pelayo sa kapolisan sa Presinto 5 sa Mandaue City Police Office (MCPO) nga nagbase sa barangay Opao nga nahinabi sa Banat News mibutyag nga sa 18 ka mga dinakpan , 12 niini ang hingkod na og edad nga gilangkoban sa duha ka babaye ug napulo ka mga lalaki nga mga sakop sa Crips gang sa maong lugar.

Matud pa niya nga ang unom ka mga menor de edad nga kaubang nadakpan ila nang gitugyan sa buhatan sa Department of Social Welfare and Development (DSWD) aron sa pag-atiman kanila apan malakip gihapon   sa kaso nga ilang ipasaka ngadto sa korte.

Dugang pa niya nga si Aldie Amaya, 23 ug Jovalyn Alonzo, 22   ilang pasakaan sa kasong paghupot ug paggamit sa gidiling drugas sanglit nasakmit sila nga naghupot sa kapin tunga sa kilo nga pinaugang dahon sa marijuana.

Gipasabot ni PO1 Pelayo nga nahiatol lang sa taas nga mga adlaw nga holiday ang pagkasikop sa mga suspetsado maoy hinungdan nga malangan usab ang ilang pagpasaka og kaso ngadto sa korte.

Gitataw ni PO1 Pelayo nga gipaabot usab nila ang pagpagawas sa resulta sa drug test nga ilang gihimo batok sa maong mga dinakpan nga maoy ilang basehan sa pagpasaka og kaso nga may labot sa paglapas sa Republic Act 9165 kon Comprehensive Dangerous Drug Act of 2002. - Romeo T. Limpangog/WC (BANAT NEWS)