Isdang may anyil gi-monitor

CEBU, Philippines - Luyo sa hingpit nga monitoring sa mga karneng baboy sa kamerkadohan ilabi na sa mga imported meat nga walay klarong kabutangan sama sa freezers, giapil usab karon sa Department of Veterinary Medicine and Fisheries (DVMF) ang pag-monitor sa mga isda.

Kini human gidungog nga adunay mga tindera nga mobutang niini og anyil nga makadaot sa panglawas sa tawo. Ang hepe sa DVMF nga si Dr. Alice Utlang mipasidaan sa mga tindera og isda nga kinahanglan nga mosubay gyud sa balaod sama sa dili pagbutang og anyil sa ilang mga produkto.

Ang pagbutang og anyil sa isda maghitsura kining presko kaayo tungod kay mopula og maayo ang hasang niini apan sa tinuoray dubok na kini ug anha nalang nahibaw-an ini og kaluto ug pagkaon.

Gihulagway kini ni Utlang nga usa ka matang sa pagpangilad ngadto sa mga kustomer. Matud pa ni Utlang nga kung butangan og kemikal ang isda makahatag og peligro ngadto sa panglawas sa mga tawo nga mokaon niini.

Gawas sa anyil, aduna pu’y magtinontong magbutang og formaldehyde (formalin) sa isda aron dugay kini madubok bisan og dili mahalin karong adlawa presko gihapon kini ini og kaugma. Apan ang formalin nga maoy gamiton sa pag-embalsamar sa mga minatay peligro sa tawo ug makamatay.

“Dili man na maayo, kay klaro man kaayo nga giilad ang mga kustomer niana,” sumala pa ni Utlang. Ang City Ordinance 2006 nagkanayon nga dunay nagtangag nga silot nga ipahamtang batok sa mga tinderang magtinonto sa ilang pagbaligya ilabi na ang pagbutang og kemikal sa isda.

Moabot ngadto sa P2,000 ang multa sa masakpan nga mobuhat sa maong matang sa tinonto ug magkasaka kini depende kung kapila kini nga masakpi. (BANATNEWS)