Napalgang nagkulob sa lapok
CEBU, Philippines - Patay nang napalgan ang 64-anyos nga kawani sa city hall sa Mandaue nga gituohang nalumos samtang nanginhas sa hunasan duol sa barkong guba sa sitio Kompang sa barangay Labogon, dakbayan sa Mandaue.
Ang namatay mao si Arufo Sabordindo, nagpuyo sa barangay Basak sa maong dakbayan ug nadestino sa Department of General Services (DGS) sa kagamhanan sa maong dakbayan.
Si PO3 Sanches Fegarido sa Investigation Detection and Management Bureau (IDMB) sa Mandaue City Police Office (MCPO) miingon nga nadiskubrehan ang patay’ng lawas sa biktima ni Danilo Sagahasan, 33, taga barangay Basak sa maong dakbayan.
Kini maoy dali nga nakapadangat og kasayuran ngadto kang barangay Kapitan Vicente Dayanan sa barangay Basak sa maong dakbayan kinsa mao usab ang nagtaho sa kapolisan.
Matud pa ni Fegarido base sa pamahayag sa pamilya niadtong Domingo sa hapon nananghid nga manginhas sa hunasan sa maong lugar si Sabordindo apan wala na kini makauli.
Ang patay’ng lawas niini napalgang nagkulob sa kalapukan niadto nang Martes sa hapon.
Giawhag sa kapolisan ang kabanay nga ipaawtopsiya ang patay’ng lawas niini aron masuta kun may foul play ang kamatayon niini. - BANAT NEWS
- Latest
- Trending
