LCPO blangko pa sa ambush diha sa bridge

CEBU, Philippines - Nagpabilin pa gihapong blangko ang kapolisan sa dakbayan sa Lapulapu alang sa pag-ila sa mga mamumuno sa nadakpan sa kasong pagpanulis nga gibanhigan sa duha ka armadong lalaki nga nagsakay human kini makabutang og piyansa sa korte alas-3 pasado ang takna sa miaging hapon.

Nanggawas karon ang mga alegasyong posibleng polis ang mipatay sa biktimang si Justin Secretarua Avanceña tungod sa usa sa mga miduol nga mahal sa kinabuhi sa biktima ang nagpunay og singgit dungan sa pagdanguyngoy diha sa crime scene nga polis ang ilang gidudahang kriminal.

Si PO2 John Carlo Jocotan sa Homicide Section sa kapolisan sa maong dakbayan nagkanayon ang biktima suspetsado sa mga nahitabong pagpanulis dili lang sa dakbayan sa Lapulapu kun dili lakip na usab sa mga tulis sa dakbayan sa Mandaue.

Gitataw ni Jocotan nga nadakpan si Avenceña sa miaging semana ug nakabutang og piyansa inabagan sa ig-agaw niini nga si Edwin Callo, 20, apan sa ila nang pagpauli luwan sa taksi nakabantay silang may nagsunod nga motorsiklo kanila.

Hinungdan nga migawas ang biktima ug midagan apan gigukod sa mga kriminal nga pulos nagsuot og helmet diha sa Marcelo Fernan Bridge ug gipusil.

Dihang misakay sa usa ka delivery van ang biktima diha kini nila gikaligoan og bala hangtud nga kini namatay.

Base sa mga igo sa bala dili lagyo ang mga buslot sa bildo sa sakyanan nga nakapaduda og maayong hanas sa armas ang mga kriminal. Ang kapolisan sa unang pamahayag mibutyag nga posibleng kaaway sa gang sa biktima ang mga responsable ingon man ang pagkalambigit niini sa mga krimen ug ang paglihok sa mga vigilante. (BANATNEWS)