Ig-agaw nga mitambong sa party gipusil patay

CEBU, Philippines -  Patay dihadiha ang usa ka lalaki human kini gipusil sa iyang ig-agaw atol sa usa ka birthday party sa barangay Babag sa dakbayan sa Lapulapu sa milabay’ng gabii.

Ang biktima mao si Estanley Oclares, 38, residente sa maong dapit samtang mitahan dayon sa iyang kaugalingon ang suspek nga si Zardo Ymbong, 25.

Nasayran sa Banat News nga samtang naglingkod sa gawas nga bahin sa panimalay ni Ymbong gumikan kay imbitado kini sa usa ka birthday kalit kining giduol sa suspetsado.

Sa panagkita sa duha kalit nga mibunot og kalibre .38 nga rebolber si Ymbong ug dayong pusil ngadto ni Oclares sa ulo.

Human sa pagpamusil dali usab nga misurender si Ymbong sa iyang ig-agaw nga pulis nga si PO1 Antonio Inihao kinsa maoy mihatod sa suspetsado sa buhatan sa kapolisan.

Nasuta sa Banat News nga adunay daang panagsungi si Ymbong ug Oclares ug maoy hinungdan sa krimen nga nahitabo.

Gumikan niini kasong murder ang gipasakakagahapon sa mga sakop sa kapolisan batok ni Ymbong samtang natanggong kini detention cell sa kapolisan sa dakabayan sa Lapulapu. (BANAT NEWS)