'Nag-iring-iring' nga mga polis mi-deny

CEBU, Philippines - Hugtanong gihimakak sa duha ka mga polis nga nag-iring iring silang duha sulod sa Naga City Police Station nga gireklamo sa usa ka babaye ngadto sa buhatan ni Police Regional Office-7 director Ager Ontog Jr. pinaagi sa suwat.

Ang policewoman nga nagranggo og Police Officer 2 (pangalan gipugngan) sa tubag niini ngadto sa Provincial Investigation and Detective Management Branch (PIDMB) sa Cebu Provincial Police Office (CPPO) miingon nga igo ra siyang gigakos sa gipasanginlang minyo nga polis nga nagranggo og Police Officer 3 (pangalan gipugngan) niadtong Abril 4 niining tuiga.

Matud pa sa policewoman nga imahinasyon lang sa reklamanteng babaye ang iyang nakita ug walay igong basehanan ang mga alegasyon niini ngadto nilang duha.

Ang lalaking polis usab nga gireklamo mihimakak usab nga diha siya sa ilang police station nianang adlawa sanglit off-duty siya niini ug miingon nga dili angayang hatagan og gibug-aton ang pasangil kanila.

Apan sa rekomendasyon ni Insp. Julius Ompad ang imbestigador sa PIDMB iyang gidasig ang babayeng reklamante nga kinahanglan pinirmahan sa abogado ang iyang suwat reklamo nga gipadala ngadto kang Ontog.

Kini tungod kay ubos sa National Police Commission (Napolcom) Memorandum Circular 2007-001 kinahanglang ang sulat reklamo ma-subscribed sa usa ka abogado ug ma-authenticate ang iyang affidavit. “In appropriate display of affection. With the directive of Sr. Supt. Patrocinio Comendador he require nga patubagon ang gipasanginlan,” matud pang Ompad sa mga tigbalita.

Ang duha ka mga polis dugay nang gidungog nga may relasyon bisan paman dakong minyo ang lalaking polis.

Girekomendar ni Ompad nga buwagon og police stations ang duha nga gitugotan usab niadtong Mayo 23 ni Comendador. “They will assign separate police station while ongoing ang investigation,” matud pang Ompad.

Ang reklamante nasuta nga iyaan sa usa ka suspek sa pagpanglugos sa ila rang ig-agaw niadtong bulan sa Enero ug ang policewoman maoy nag-imbestigar sa kaso samtang ang lalaking polis maoy nakadakop sa rape suspect. (BANAT NEWS)