Rama nalipay, Sugbo sumbanan paghipos sa basura

CEBU, Philippines - Mapasigarbohong gipahibalo ni Mayor Michael Rama nga adunay ubang mga local government unit nga sakop sa Rehiyon-7 nga buot mangayo og ideya sa siyudad bahin sa pagpatuman niini sa pagbahig sa basura nga malata ug dili malata.

Si Rama kinsa mao usab ang pangulo karon sa Regional Development Council (RDC)7 nagkanayon nga iya nang gipahan-ay ang ilang mga ebalwasyon sa pagpatuman nila sa “No Segregation, No Collection Policy” kay iya kining ipaambit sa ubang LGU sa Rehiyon 7.

Nagkanayon si Rama nga nagbaha karon ang mga plano sa RDC ug kanunay gyud nilang gahinan og mga programa ang bahin sa hustong paghipos sa basura.

Dugang pa niya nga dako kaayo og ikadaot sa palibot kung dili tarungon paghipos ang basura kay mao kini hinungdan sa pagbaha kay moungot man kini sa mga kanal.

Malipayon ang mayor gumikan kay mahimong modelo ang siyudad sa Sugbo sa lapad nga pagpatuman sa pag-segregate sa mga basura.

“Nabantayan nako nga ang mga dalan nga hugaw kaayo kaniadto , limpiyo na karon busa nagpasabot kini nga mituman na gyud ang mga tawo sa atong policy ,” sumala pa ni Rama. (BANAT NEWS)