Giluba hangtud namatay 17-anyos di makapaso

CEBU, Philippines - Dili na makapaso pa sa iyang graduation karung adlaw’ng Domingo ang usa ka 17-anyos nga menor de edad nga lalaki human siya gidunggab sa makadaghang higayon sa iya ra sab nga silingan ug namatay.

Nahitabo kini kagahapon sa alas-12 sa tungang gabii diha sa sitio Nava, Alaska sa barangay Mambaling siyudad sa Sugbu.

Ang biktima giila sa kapulisan nga mao si Jeffrey Sabroso, 17, taga sitio Lawis sa nahisgutang lugar ug mogradwar na sa elementarya ug gikatakdang mopaso na unta karung Domingo.

Ang suspek naila lang sa ngalang Jose giingong nagpuyo ra sab diha sa naasoy’ng dapit.

Sa pasiunang pakisusi sa Homicide Section sa Cebu City Police Office (CPPO) pinangulohan ni SPO4 Alex Dacua ug mga kauban nagbutyag nga mibilar ang biktima sa haya sa ilang silingan nga si Arnaldo Cason kinsa gipusil patay sa duha ka wala mailhing tawo niadtong Lunes sa buntag diha sa nahisgutang lugar.

Ang biktima giingong nagbarog-barog lang niadtong higayona sa dihang kalit nga miabot ang suspetsado ug walay daghang estorya kalit nga gidunggab sa makadaghang higayon ang biktima.

Si Sabroso nga nakaangkon og daghang samad dinunggaban sa iyang kalawasan gisuwayan pa unta og dala sa iyang mga silingan ngadto sa Cebu City Medical Center (CCMC) apan gideklarar siya sa mga doktor nga dead on arrival (DOA).

Samtang ang suspetsado sa pagkutlo ning balita wala pa madakpi sa kapulisan nga daling miikyas human sa hitabo.

Ang kapulisan blangko pa gihapon sa motibo sa krimen apan nagpadayon sila sa ilang imbestigasyon aron masuta kun nganong gipatay ang biktima sa suspetsado.

Apan kasamtangan gisubay sa kapulisan ang personal nga atraso sa biktima ug sa suspek. (EIM)   (BANATNEWS)