Mga building sa Sugbo peligro sa linog

CEBU, Philippines - Giangkon sa kagamhanan sa dakbayan sa Sugbo nga mamilegro ang mga building dinhi sa dakbayan kung moabot ang linog sama sa gikusgong 8.9 magnitude nga miigo didto sa Japan kay dili makasugakod ang kalig-on sa mga edipisyo dinhi sa maong gikusgong tay-og.

Kini maoy gibutyag sa hepe sa Office of the Building Official nga si Engr. Josefa Ylanan.

Aminado hinuon si Ylanan nga luwas gihapon ang mga establisamento ning siyudad kung basihan ang National Building Code sanglit nakatuman man sila sa ilang mga rekisitos

Gipasabot ni Ylanan nga grabi kalig-on ang pundasyon sa mga building didto sa Japan tungod kay kanunay man kining linugon.

Dugang pa niya nga angayan gyung sutaon kanunay ang National Building Code sanglit nagdagan ang panahon ug adunay daghang kausaban sa tanang butang.

Ang katapusang Building Code nahimo niadtong 1977 ug sa pagka-karon nagkadaghan ang mga building sa nasud.

Hinuon higpit nga gimonitor sa kagamhanan ang kahimtang sa mga establisamento dinhi diin sumala pa sa balaod, kinahanglan kini nga ipaubos sa renovation matag 15 ka tuig gikan sa pagtukod niini.

Samtang si Mayor Michael Rama mipadayag nga nakaalerto kanunay ang Cebu City Disaster Risk Reduction and Management sa bisan unsa nga katalagman ug katambayayong usab ang ubang mga rescue team.(WC) (BANAT)