Biktima sa linog sa New Zealand gikatakdang mauli na sa Sugbu

CEBU, Philippines - Gikatakdang moabot karong Sabado dinhi sa Sugbo ang patay nga lawas sa nurse nga si Ivy Jane Cabonales kinsa usa sa biktima sa linog nga miigo didto sa New Zealand.

Kini maoy gipahibalo sa iyang iyaan nga si Helen Boholst Baysa kinsa personal nga mibisita sa buhatan sa The Freeman/Banat News kagahapon.

Sumala pa ni Baysa nga nailhan ang patay’ng lawas sa iyang pag-umangkon gumikan sa DNA testing ug sa tattoo nga nahimutang sa tiil niini.

“Wala gyud mi gibasol sa nahitabo, kay trahedya ra gyud tu,” nagkanayon si Baysa.

Dungan niini, mouli na usab dinhi sa Sugbo ang tibuok pamilya ni Cabonales nga unom na ka tuig nga nagpuyo sa New Zealand.

Suma pa ni Baysa nga wala na’y planong mobalik pa sa New Zealand ang pamilya ni Cabonales kay na-trauma kini sa nahitabo.

“Hangtud karon, napa man gu’y aftershock sa area, maong dili na gyud sila mamalik didto (New Zealand),” dugang pa ni Baysa.

Unom na ka tuig nga nagtrabaho si Cabonales sa maong nasud ug sa dihang wala kini molarga, nahimo usab kini nga maestra sa usa ka unibersidad dinhi sa Sugbo.

Ang iyang bana nagtrabaho isip engineer ug duna sila’y anak nga kaluha nga babaye. Ang iyang patay nga lawas ipahimutang sa St. Peter sa dalan Sikatuna ug ang lubong niini, sabotan pa sa iyang kabanay.

Gipadayag ni Baysa nga kasamtangan pa nila karon nga gi-proseso sa Department of Foreign Affairs aron makuha nila ang financial assistance sa gobiyerno.   (BANAT NEWS)