Balay pataura'g tangke

CEBU, Philippines - Panghingusgan na sa siydudad sa Sugbo ang pagpatuman sa polisiya nga magbutang gyud og rainwater tank ang matag balay.

Sumala pa sa hepe sa Office of the Building Official (OBO) nga si Engr. Josefa Ylanan nga magsugod na sila sa estriktong pagpatuman niini.

Dugang pa niya nga usa kini sa mga panginahanglan sa dili pa mokuha og building permit o ba kaha certificate of occupancy. Nagkanayon si Ylanan nga dako kaayo og tabang ang rainwater tank gumikan kay maminosan na unya ang pagbaha kung mobunok ang uwan labi na sa mga lugar nga gamay og kalutsan sa tubig.

Ang mosupak sa maong polisiya makamulta og P1,000   ug dili isyuhan og building permit.

Nasayran nga nakahatag og kahasol ang grabeng pagbaha   ug maminosan lang kini kung motuman sa ilang obligasyon ang mga tawo.

Dugang pa niya nga importante kaayo ang rainwater tank sanglit ang mapundo niini nga tubig mahimong magamit sa pagbubo sa tanom, pagpanglimpiyo sa sakyanan ug uban pa.

Ang mga tawo sa OBO magsugod na sa pag-monitor aron maimplentar ang maong palisiya ug giisip nila kini nga kontribusyon   aron mahatagan og solusyon ang suliran sa pagbaha nga padayon nga giatubang karon sa siyudad. - BANAT NEWS