Pribadong namaligya'g tubig sa catmon 'apektado' sa cholera

CEBU, Philippines - Apektado karon ang mga pribadong nagnegosyo og tubig sa lungsod sa Catmon human mikatap ang taho sa sakit nga cholera sa maong lugar nga giingong gikan sa tubig. Kini human wala giklaro sa mga taho kung diin gyud ang tinubdan sa tubig nga nakaingon sa sakit sa pipila ka mga molupyo sa lugar.

Apan karon, giklaro ni Romeo Arrabis, tagdumala sa Catmon Water and Sanitation Services Cooperative (CAWASSCO) nga ang gitumbok nga tubig nga hugaw nga nagdala sa sakit nga cholera mao ang patubig nga gipadagan sa lokal nga kagamhanan.

Ang Department of Health mismo miawhag nga ayuhon ang patubig sa lungsod apan wala usab giklaro kung ang sa kooperatiba ba o ang sa lungsod.

Matud pa ni Arrabis nga si Dante Colonia, tagdumala sa Water Market Refilling Station nga ninggamit sa tubig sa CAWASSCO ang nipadayag sa iyang reklamo.

Kini gumikan kay ang ilang binotelya nga tubig nga gipamaligya sa ubang lugar sama sa dakbayan sa Danao ang dili na mahalin gumikan kay gikan kini sa Catmon.

Giklaro ni Arrabis nga computerized ang ilang gigamit nga chlorinator maong makapasalig sila sa kalimpyo ug kaluwas sa tubig nga mainom sa katawhan nga gikan kanila.

Tungod sa epekto sa maong balita, nanawagan si Arrabis nga dili iangin ang ilang patubig sa kaso sa cholera gumikan kay klaro man ang tinubdan sa tubig nga giingong hugaw nga nainom sa mga biktima. Sa labing uwahing talaan adunay 15 ka mga tawo ang nasakit og cholera sa maong lungsod ug niadtong milabay’ng buwan dul-an sa 500 ka tawo ang nasakit og diarrhea sa Danao, typhoid fever sa Alegria tungod gihapon sa kahugaw sa ilang tubig nga nainom.

Nunot niining kanunay’ng pagkasakit sa mga konstituwente sa lalawigan tungod sa kagaw diha sa ilang mga water systems giawhag sa Kapitolyo ang opisyales   sa kalungsuran nga monitoron pag-ayo ang mga tinubdan nila sa tubig.

Matud pa ni Provincial Health Officer, Dr. Cristina Giango niining pagpunay og ulan-ulan taas kaayo ang kahigayunan nga motakboy na usab ang kagaw ngadto sa tubig mainom sa katawhan ilabi na kun dili maayo ang pagkataud sa mga linya sa tubig. (BANAT NEWS)