Citywide clean-up sa siyudad
CEBU, Philippines — Nanawagan si bise mayor Donaldo “Don-Don” Hontiveros sa mga molopyo sa Dakbayan sa Sugbo nga mosalmot sa ika-19 nga Cebu Citywide Clean-Up Challenge karong Sabado Marso 15, 2025.
Lakip sa giawhag ang mga pribadong stakeholders, nagkadaiyang organisasyon, barangay vounteers, health workers ug mga Sugbo scholar.
Si Hontiveros nagkanayon nga quarterly ang maong clean-up drive diin nahitabo ang katapusang pagpanglimpyo niadtong Disyembre 14, 2024. Ang tema sa labing una nga clean-up drive karong tuiga mao ang “Limpyong Siyudad, Malipayong Kumunidad”.
Tumong sa maong kalihukan mao ang pagpalambo sa kasayuran sa kalikupan ug makahatag og kadasig sa komunidad aron nga magtinabangay ug imintinar ang kalimpyo ang Dakbayan sa Sugbo.
Ang maong clean-up drive ubos kini sa Cebu City Ordinance 2593 nga naghimong balaud sa pagpanglimpyo sa mga suba, agianan sa tubig, ug mga dapit sa baybayon sulod sa siyudad.
“This is a community effort and we need as many hands as possible to make Cebu City cleaner and greener”, suma pa ni Hontiveros. Magsugod ang kalihukan sa alas 6:00 sa buntag sa sitio Mahayahay 2 sa Barangay Pasil.
Gitug-an ni Hontiveros moabot sa 36 ka mga lugar ang limpyuhan karong Sabado lakip na ang mga sapa sa Bulacao, Tagunon, Guadalupe, Lahug, Kinalumsan River, Estero de Parian, Mahiga Creek, ug Butuanon River.— MEL BANAT NEWS
- Latest
