3 gisuyaan gipangluba angol

CEBU, Philippines - Nalandig sa tambalanan ang tulo ka mga lalaki human sila panunggaba sa wala hiilhing kriminal samtang sila nag-inom sa Jufront F and B Barbecue House sa dalan Katipunan, sa barangay Tisa siyudad sa Sugbo sa miaging hapon.

Ang mga biktima mao sila si Pablito Magno, ulitawo, usa ka installer ug stay-in worker ug lumad nga taga Bicutan, Paranaque City; Marcelino Macasiebo, 37, minyo, installer ug stay-in worker sa nahisgutang lugar, nga taga 2727 Pagkahiusa Street, Las Piñas City, ug Ernesto Hermo Borres, 29, minyo, lumad nga taga 16 Diamond St,. Bacoor, Cavite.

Segun sa asoy sa mga biktima ngadto kang SPO4 Alex Dacua ug mga kaubanan nga sila si PO2 Edario Manatad ug PO2 Jodan Batucan sa homicide section sa Cebu City Police Office nga nag-inom sila niadtong higayona sulod sa F and B vedioke karaoke bar ug sa dihang nahuman na sila og inom nakahukom silang tulo nga mamauli sa ilang gitrabahoan sa Tisa.

Apan ang laing grupo sa mga lalaki nga nag-inom usab sa pikas lamesa kalit lang nangataki kanila ug gitabangan sila og kulata ug dili pa igo gipanunggab pa gyud sila.

Si Magno nakaangkon og samad dinunggaban sa walang bahin sa lawas, samtang samaran usab sa tuong bukton si Macasiebo apan si Borres maoy nagrabihan tungod kay nakaangkon kini og daghang samad dinunggaban sa nagkadaiyang parte sa iyang kalawasan.

Ang tulo ka biktima daling gitabang sa mga tawo diha sa maong dapit ug gidali paghatod ngadto sa Cebu City Medical Center samtang ang midunggab kanila daling nakasibat palayo sa lugar ug wala na madakpi sa miresponding kapolisan.

Ang mga otoridad nagtuo nga gisuyaan ang mga biktima sa laing grupo sa mga lalaki tungod kay matud pa, ang usa kanila maayo og tingog ug mikanta kini og My Way hinungdan nga sila gipangluba. (BANAT)