Importers wa moangkon sa smuggled rice

CEBU, Philippines - Mipadangat og suwat sa pagpanghimakak ang tulo ka mga kompaniya nga lakip sa consignee sa 33 ka 20-footer container vans sa mga smuggled nga bugas nga nasakmit sa Bureau of Customs sa Sugbu sa milabay’ng semana nga giablihan sa milabay’ng hapon.

Sa lima ka mga consignees, tulo niiini ang mipadangat na sa ilang suwat pagpanghimakak nga sila ang tag-iya sa maong kargamento.

Ang mihimakak mao ang E.P Precision Cebu Parts; K & A Metal Industries Inc. pinaagi ni Mamerto Suroy-suroy ang in-charge sa import/export sa maong kompanya ug ang general manager sa Asian Craft (Cebu) Inc. nga si Alex Alasco.

Ang tulo ka kompanya mipadala og suwat sa BOC nga nanghimakak nga ilaha ang maong mga kargamento nga naa sa alert order ni BOC Commissioner Angelito Alvarez niadtong petsa-7 ning bulana.

Samtang gipaabot pa ni Atty. James Dy Buco ang legal officer sa BOC-Port of Cebu ang duha pa ka kompaniya nga ginganlan usab nga maoy mga consignees(mga pangalan gipugngan sa Banat News) alang sa ilang tubag kalabot sa maong mga kargamento.

Matud pa ni Buco ilang ipatawag ang lima ka mga nalambigit nga consignees atol unya sa itakdang pagdungog sa maong kargamento, aron personal nilang maklaro ug mohimakak sa maong kargamento ug sanglit dili paigo sa pagpadala lang og suwat kanila.

Samtang ang Philippine Economic Zone Authority administrator nga si Sansaluna Pinagayao miluwat usab og suwat ngadto sa BOC ug mihimakak sa kalambigitan sa ilang mga locators sud sa Mactan Export Processing Zone sa pinayuhot nga kargamento.

Matud pa ni Pinagayao wala silay gihatagan og entry o pagtugot sa maong mga kontrabandong mga container vans nga i-deliver ngadto sa PEZA Cebu.

Nagtuo si Buco nga gipahimuslan sa mga smugglers og bugas ang pangalan PEZA o sa MEPZ gumikan kay fast lane ug ubos sa green lane policy ang mga kargamento alang niini.

Ang BOC dili na manguti-kuti ug dili na iagi og 100 porsiyento inspeksyon, libre ang duties and taxes niini ug clearances sa mga kargamento basta kini gi-address sa MEPZ.

Kahinumduman nga giablihan sa mga sakop sa BOC-POC uban ni Joey Yuchongco ang director sa ESS Customs Police gikan sa ulohang buhatan nga gipadala ni Comm. Alvarez ang 33 ka mga container vans nga gideklarar nga mga piyesa sa nagkadaiyang electronic gadgets.

Kini gikarga luwan sa M/V Kota Hening V gikan sa Vietnam apan dihang ug kini pulos mga misdeklarado diin gibanabana nga mokabat sa 18 milyones ka pesos.

Samtang si BOC-POC District Collector Atty. Ronnie Silvestre moluwat og warrant of seizure and detention sa maong mga bugas samtang adunay dinaliang imbestigasyon nga himuon batok niini. Matod pa ni Silvestre nga kini mensahe ngadto sa mga smugglers nga wala magmika ang buhatan sa adwana sa Sugbu. – BANAT NEWS