Duha ka lalaki nalubaan, usa sa suspek kanhi kapuyo

CEBU, Philippines - Duha ang nangaangol sa pagpanunggab sa managlahing lugar niadtong milabay’ng adlaw dinhi sa dakbayan sa Sugbu.

Ang usa sa mga nadunggaban mao si Malvin Moreno, 32, nalandig sa tambalanan human nadunggaban sa luyong bahin sa iyang lawas pasado ala-1:30 sa hapon sa iyang kanhi kapuyo nga si Liezel Matmat, 26.

Matud sa kapulisan ang biktima ug ang suspetsado nagkasumpaki sa sidewalk sa maong lugar tungod sa personal nga rason. Apan sa maong panaglalis mikuha ang suspetsado og kutsilyo sa kusina ug dayon gidunggab sa biktima sa luyong bahin sa lawas.

Ang biktima daling gidala sa Cebu City Medical Center samtang ang suspetsado gidakop sa mirespondeng mga polis samtang nagbibit pa og kutsilyo.

Sa pagkakaron ang suspetsado anaa sa Station 5 Cebu City Police Office (CCPO) nabalhog.

Samtang sa laing bahin naangol si Jesus Estillore, 37, human kini madunggabi diha sa C. Padilla St. sa barangay Duljo-Fatima pasado alas 2:30 sa kaadlawon sa wala mailhing tawo.

Ang biktima mitug-an sa kapulisan nga naglakaw siya padulong mopauli kalit adunay pipila ka tawo miduol kaniya ug gitabangan siya og kulata ug dayon dunggab sa iyang likod.

Ang mga wa mailhing tawo daling misibat human maabot ang duha ka barangay tanod, ang biktima daling gidala sa Cebu City Medical Center (CCMC). (BANAT NEWS)