Nasunogan sa South district gihataga'g tseke ni Kong. Osmeña

CEBU, Philippines - Biktima sa sunog sa barangay Duljo-Fatima ug Guadalupe nakadawat og P1.3 milyon nga financial assistance gikan kang Cebu South District Kong. Tomas Osmeña kauban ang Department of Social Welfare and Development (DSWD) kagahapon.

Si Osmeña kauban ang iyang asawa nga si Cebu City Councilor Margarita Osmeña personal nga mihatag sa tseke sa duha ka barangay.

Ang pagpanghatag sa hinabang sa Duljo-Fatima gipahigayon sa sports complex diin 211 ka tawo nga biktima ang nahatagan sa kantidad nga mikabat og P871 mil.

Samtang sa barangay Guadalupe adunay 99 ka biktima sa sunog nga nahitabo niadtong Septiyembre sa sitio Riverside sa barangay Guadalupe ug nahatagan og hinabang sa kantidad nga P476 mil.

Kauban sa magtiayong Osmeña sa pagpanghatag sa hinabang ang director sa Department of Social Welfare and Development region 7 nga si Ma. Evelyn Macapobre.

Matud pang Macapobre ang maong hinabang gikan sa Priority Development Assistance Fund (PDAF) ni Osmeña.

Dugang pa ni Macapobre nga kadtong mga tag-iya sa nasunog nga balay gihatagan og tseke nga P10 mil samtang kadtong nasunogan nga nag-abang lamang adunay tagsa ka libo. Ang total nga kwarta nahatag ni Rep.Osmeña P1,347,000 alang sa 310 ka biktima sa sunog sa duha ka baranggay.

Si Clarite Gabatar, 63, molupyo sa barangay Guadalupe usa sa nakadawat sa hinabang mibutyag sa Banat News nga malipayon sila ug nagpasalamat kang Osmeña tungod kay dako kini og ikatabang sa ilang suliran karon.

Ang mga nasunogan hinay-hinay nang mipatukod og balik sa ilang mga balay ginamit ang gihatag nga mga housing materials gikan sa dakbayan sa Sugbu nga gisaad human sa maong sunog. (BANAT NEWS)