Mga vendor sa Tabunok balhinon sa bag-ong merkado

CEBU, Philippines - Ang mga manindahay sa merkado publiko sa barangay Tabunok, dakbayan sa Talisay ug ang mga mamalitay edukahon sa kagamhanan sa siyudad kabahin sa pagbalhin unya sa merkado ngadto sa barangay Lagtang.

Niadtong unang semana sa Oktubre niining tuiga ang fish section maoy unang gi-edukar sa siyudad apan nahunong kini tungod sa eleksyon sa barangay.

Sa sunod semana padayonon sa siyudad ang nahisgutan nilang kalihukan.

Matud ni Talisay City Administrator Richel Bacaltos nga gawas sa pag-edukar paminawon usab nila ang mga yango-ngo sa mga tindera.

Sayo niini nagpanon ang mga vendor ngadto sa city hall sa miaging buwan ug mipadayag sa ilang pagsupak nga balhinon sila ngadto sa market-cum-terminal sa Lagtang.

Usa sa hinungdan mao nga tuyoon kaayo alang sa mga mamalitay ang Lagtang busa malagmit langawon ang ilang mga baligya didto nga dili mahalin.

Apan si Bacaltos nagkanayon nga tukoran og access road ang merkado sa habig sa sapa sa Mananga aron sayon ra alang sa mga mamalitay ang pagpangompra sa merkado didto sa Lagtang.

Gipasabot sa city administrator nga nagkadaghan ang populasyon sa Talisay ug ang merkado diha sa Tabunok nagkaanam na og kahuot ug gani apektado na ang dagan sa trapiko sa lugar nga naghatag og peligro sa kinabuhi sa mga mamalitay.

Ang market-cum-terminal gihulagway ni Bacaltos nga hamugaway itandi sa kasamtangang merkado sa Tabunok.

Sayo sa sunod tuig gitakdang buksan ang market-cum-terminal ug hugtan gyud sa kagamhanan ang lakang sa pagpabalhin sa mga manindahay   gikan sa merkado sa Tabunok.

Matud usab ni Bacaltos nga ang karaang merkado posibleng tukoran og mga commercial building. – BANAT NEWS