Gipusil sulod sa balay

CEBU, Philippines - Samdan ang usa ka ulitawong guwang nga gisaka ug gipusil sa wala hiilhing mamumuno sa sulod sa iyang balay sa sitio Nawanao, barangay Subangdaku, dakbayan sa Mandaue sa miaging kaadlawon.

Ang biktima mao si Ramon Enriquez II, 61, ulitawo, nga nagpuyo sa maong dapit kinsa nakabaton og bugtong samad pinusilan sa iyang dughan ug dali nga gidala sa Mandaue City District Hospital.

Ang mga sakop sa Investigation Detection and Management Bureau (IDMB) sa Mandaue City Police Office (MCPO) padayon pang misusi karon sa maong hitabo pagtino kun wala bay gikaaway ang biktima sa ilang lugar nga posibleng maoy mipusil kaniya.

Si PO3 Efren Fuentes sa kapolisan sa operation section sa Mandaue City Police Office (MCPO) nga nahinabi sa Banat News miingon nga si Jimmy Capuyan, 24, ug silingan sa biktima, mibutyag   nga diha siya sa ilang kusina dihang nakabati siya og boto sa armas de fuego.

Dihang ilang gisusi maoy ilang nasayran nga gipusil ang biktima sa wala hiilhing lalaki kinsa dali usab kaayong nakasibat pahilayo sa maong dapit. Si PO3 Fuentes miingon tua karon ibalhin ang biktima sa Vicente Sotto Memorial Medical Center sa dakbayan sa Sugbo. (BANATNEWS)