RH Bill suportahan ni Kongresista Osmeña

CEBU, Philippines - Gisuportahan ni Cebu City South District Kongresista Tomas Osmeña ang baruganan ni Presidente Benigno “Noynoy” Aquino III ang pagpanghatag niini og mga contraceptives ngadto sa mga magtiayong gusto og artificial family planning ug ingon man ang pagpasar sa kontrobersyal nga Reproductive Health Bill.

Kini bisan pa man sa kadaghan sa nibatikos sa presidente nag-una niini mao ang Simbahang Katoliko tungod sa rason nga supak kini sa pagtulon-an sa Simbahan.

Matud pa ni Osmeña sa interbyu sa DyRF nga nakauyon siya sa tinguha sa presidente nga mokunhod ang gidaghanon sa kakabus sa nasud pinaagi sa paghatag og kapilian sa magtiayong Filipino kun unsang matang sa family planning nga sagupon.

Si Osmeña nagkanayon nga wala siya makauyon sa paggamit sa Simbahan sa maong isyu aron hilabtan ang pangagamhanan sa nasud.

“Should we allow the Catholic religion to use government as an instrument of its religion...I am a Catholic. I'm not against the teachings of the church but I am against the church telling the government that you are my right arm in implementing my religion. That is not right. We might just not call it Republic of the Philippines but Republic of the Catholics," sigon pa ni Osmeña sa maong interbyu.

Si Osmeña miingon usab nga wala usab siya makauyon sa gipalanog nga panawagan sa mga opisyales sa simbahan nga mopahigayon og civil disobience kay dili kini haum nga lakang.

“Does it make them right if you will execise your right of civil disobedience? Will that make you correct? Will that make you moral?,” pangutana pa sa kongresista.

Dugang pa ni Osmeña iyang paboran ang RH Bill sa higayon nga hisgutan sa plenaryo sa Ubos Balay Balaoranan. (BANATNEWS)