Sex stimulant ordinance ni Sitoy gisaway

CEBU, Philippines - Gisaway na usab ni Gov. Gwen Garcia ang laing ordinansa nga gipangamahanan ni Provincial Board Member Arleigh Sitoy nga may kalambigitan sa pagdili sa botika sa paghatag og "sex stimulating or enhancement drugs" nga walay medical prescription ug ingon pagtugot sa asawa.

Matud pa ni Garcia nga sama sa chicharon ordinance, ang maong ordinansa ni Sitoy usa ka kataw-anan tungod kay ang pagtugot sa kapikas sa mopalit sa giingon ni Sitoy nga sex stimulating or enhancement drugs magkinahanglan pa nga i-notarized nga klaro kaayong nakapanghilabot kini sa privacy sa mga magtiayon.

Si Garcia nagkanayon nga wala siya makasabot sa tinguha ni Sitoy sa pagpalabang sa maong ordinansa tungod kay wala may klarong gibasehang rason sa pagpalabang niini ilabina nga giapil sa pagtumbok niini nga ang pagtugot sa kapikas sa mopalit sa giingong sex stimulating or enhancement drugs magkinahanglan pa nga panotaryohan.

Ang gobernadora nagkanayon nga ang maong ordinansa maoy usa sa mga konkretong ebidensiya nga gigamit ni Sitoy ang hunta probinsiyal sa ilang personal nga katuyoan.

Samtang gikwestyon ni Capitol Consultant on Information Rory Jon Sepulveda ang pagsalmot isip co-sponsor ni Vice Gov. Gregorio Sanchez sa maong ordinansa nga siya man ang presiding officer.

Dugang pa ni Sepulveda nga ang gihimo sa bise gobernador nagpakita lamang nga wala pa kasabot sa ilang katungdanan si Sanchez partikular na sa parliamentary procedure. (BANATNEWS)