P18 ang usbaw sa suholan

CEBU, Philippines - Human sa taas nga deliberasyon, aduna nay mapaabot nga P18 nga usbaw sa suholan ang mga mamumuo dinhi sa rehiyon 7 ug kini maoy nahukman kagahapon sa Regional Tripartite Wages and Productivity Board (RTWPB).

Matud pa sa regional director sa Department of Labor and Employment (DOLE-7) Elias Cayanong ang maong kantidad maoy ilang nahukman ug kini ilang gibase sa taas nga pagtoon sa dagan sa ekonomiya sa rehiyon.

Una kini nga higayon nga uniporme ang pag-pausbaw sa suweldo sa tibuok rehiyon busa gipaabot ang mga positibong reaksiyon niini sa mga mamumuo.

Gikan sa P267 nga kasamtangang minimum wage, mahimo na kini karong P285 ug kini mo-epekto human 15 ka adlaw nga publikasyon sa maong kamandoan.

Gipasabot hinuon ni Cayanong ang mga mamumuo nga dili matuman ang gipangayo nilang usbaw tungod usab sa daghang konsiderasyon sama sa pag-ilaid sa mga negosyante tungod sa kalisod sa ekonomiya karun.

Aminado si Cayanong nga dili malikayan nga dunay mosaway gikan sa mga labor sectors apan iyang giklaro nga P18 ra gyud kutob ang ilang mapa-usbaw kay mao raman kini ang mahaom sa kasamtangang estado sa ekonomiya.

Samtang ang direktor sa membership recruitment and services sa Associated Labor Union-Trade Union Congress of the Philippines nga si Ferdinand Jumapao mihangop sa maong kalamboan bisan paman nga P100 ang gisang-at nila nga petisyon.

“Nalipay na lang sad mi nga dunay usbaw nga nahitabo kay nakatabang napud na sa plite, ginagmay og pagkaon ug uban pa. Apan among giklaro nga kuwang gihapon na, kay grabe naman gud kaayo kamahal ang palitonon karon. Pero magpasalamat gihapon ta kay duna gyu’y increase nga nahitabo,” saysay pa ni Jumapao sa mga sakop sa media. – BANAT NEWS