Bimbo andam moesplikar bahin sa gireklamong SRP re-launching

CEBU, Philippines - Gibutyag ni kanhi Cebu City administrator Bimbo Fernandez nga andam siya modepensa kalabot sa pagsugod na karon sa pag-imbestigar sa Office of the Ombudsman-Visayas kalabot sa complaint batok sa kanhi mayor ug karon kongresista nga si Tomas Osmeña sa paggasto niini og kapin sa P1 milyon sa re-launching sa South Road Properties (SRP) niadtong Mayo.

Kahinumduman nga dunay upat ka mga tawong mireklamo sa buhatan sa Ombudsman gumikan kay matud pa nga gigamit sa pamolitika ang maong kalihukan sanglit nahimo kini ‘miting de avanse’ sa Bando Osmeña Pundok-Kauswagan (BOPK).

Ang kadagkoan sa BOPK daan nang mihimakak nga ang launching ug ang ilang ‘miting de avanse’ sanglit managlahi ang venue niini apan parehong anaa sa SRP. Ang mga nangreklamo naglangkob nila ni Peter Onde ug Rodolfo Pepito sa barangay Carreta, Leonardo Abarquez nga taga barangay Bulacao ug Fletcher Pinatil nga taga barangay Camputhaw.

Matud pa sa upat nga ang gipangangkong re-launching sa SRP nahitabo duha ka adlaw sa dili pa mag-eleksyon niadtong Mayo 10 ug gipasangil nilang tataw kini nga gigamit sa kampanya sa BOPK.

Apan depensa pa ni Fernandez nga imbitado ang tanang tawo sa maong kalihukan busa dili matawag nga pamolitika ug mao usab kini ang reaksiyon ni kanhi Cebu City mayor ug karon Kongresista Tomas Osmeña kinsa mihulagway nga ang tumong sa maong kalihukan mao ra gyud ang pag-promote sa SRP.

Sa pagka-karon ang Ombudsman nagpaabot pa sa tubag sa kagamhanan sa siyudad sa Sugbo nga pagpamatuod nga ang SRP launching niadtong Mayo 8 aduna gyud kalabotan sa kalihukan sa Dakbayan. (BANATNEWS)