Trabahante nadagit sa trak patay

CEBU, Philippines – Patay ang trabahante sa usa ka kompanya sa barangay Tipolo, dakbayan sa Mandaue human madagit sa 10-wheeler truck alas-12 pasado ang takna sa miaging tungang gabii.

Ang namatay mao si Zaldy Salvador, taga Jaclupan sa dakbayan sa Talisay samtang ang drayber sa 10-wheeler truck giila nga si Mauricio Lapus, taga Pangamihan sa dakbayan sa Toledo.

Si PO2 Dante Flores sa traffic division sa Mandaue City Police Office (MCPO) miingon nga gikan sa amihanang bahin sa lalawigan ang trak paingon na pauli sa dakbayan sa Toledo.

Base sa imbestigasyon kalit milabang ang biktima nga nagbarag-barag sa paglakaw ug gituohang hubog nianang tungura ug wala mabantayi ni Lapus hinungdan nga napunggit kini.

Sa kahadlok nga pasipad-an sa mga estambay gipabulhot ni Lapus ang trak ug milahos sa buhatan sa dakbayan sa Sugbu ug mitahan sa Cebu City Police Office sa Gorordo Avenue.

Ang CCPO na maoy mitugyan kang Lapus ngadto sa traffic division sa MCPO.

Ang biktima gidali sa pagdala sa Mandaue City District Hospital apan gideklarar kini sa mga doktor nga dead on arrival. (BANATNEWS)