Midwife sa Barili nibiya sa nanganak gikiha gyud

CEBU, Philippines - Giduso na sa Commission on Human Rights (CHR-7) ngadto sa Ombudsman Visayas ang reklamo sa usa ka inahan nga namatyan sa iyang gisabak batok sa midwife sa barangay health center tungod kay gibiyaan kini sa pagsakay sa ambulansya gikan sa Barili paingon sa Vicente Sotto Memorial Medical Center.

Matud pa ni CHR Special Investigator 3 Leo Villarino sa interbyu sa Banat News nga ang Ombudsman Visayas na maoy adunay hurisdiskyon sa pag-imbestigar sa reklamo ni Leonisa Marata Barcoma, 29, residente sa sitio Batugag Uwak, barangay Cabcaban lungsod sa Barili batok kang Jessica Samonte, ang barangay midwife sa barangay Cabcaban, lungsod sa Barili.

Si Villarino nagkanayon nga ang ilang buhatan mihatag sa maong kaso ngadto sa Ombudsman kay mao kini ang unang giduol ug gisumbongan sa reklamante.

Iyang giklaro nga ang ilaha igo lamang pagtabang kang Barcoma sa paghimo sa iyang complaint affidavit ug pag-isyu og certification of non- forum shopping.

Si Barcoma mibasol kang Samonte nga maoy nakaingon sa pagkamatay sa iyang panganakay nga anak niadtong Hunyo 18 diha sa Vicente Sotto Memorial Medical Center (VSMMC) tungod kay gikan sa Barili wala sila kuyogi bisan nasayod   sa kadelikado na sa kahimtang nilang duha sa iyang anak.

Hinuon si Samonte nagkanayon nga andam siyang motubag sa maong kaso ug mihimakak sa mga pasangil ni Barcoma tungod sa pangangkong ang iyahang responsibilidad sa mga pasyente kutob ra sa district hospital sanglit dili man siya empleyado sa maong tambalanan.

Gipanghimakak usab ni Samonte nga gihangyo siya ni Barcoma nga kuyogan siya hangtud sa VSMMC kay kuyaw na kaayo ang kahimtang niini. (BANATNEWS)