Cutie, Tomas managlahi og stand sa Brgy. SK elections

CEBU, Philippines – Managlahi ang baruganan sa duha ka mga kongresista sa dakbayan sa Sugbu human si North District Kongresista Rachelle Margueritte "Cutie" Del Mar nagtinguhang ipaoktaba ang Barangay ug Sangguniang Kabataan Elections karong tuiga apan si South District Kongresista Tomas Osmeña supak niini.

Si Del Mar moduso unya sa iyang House Bill 1867 diha sa hawanan sa Kongreso aron i-reset ang maong piniliay gikan sa orihinal nga petsang nalatid sa Akta Republika 9164 nga nagmandong sa katapusang Lunes sa bulan sa Oktubre 2010.

Buot ni Del Mar nga isibog kini sa susamang petsa apan sa sunod tuig 2011 na lamang.

Si Del Mar sa iyang explanatory note sa maong bill mibutyag nga bag-ohay palang natapos ang nasud sa local ug national elections nga mao usab ang labing unang higayon nga migamit ang Commission on Elections sa automated polls dugangan pa nga mao usab kini ang labing taas nga campaign period nga nasinati sa nasud.

Dugang pa niini mao ang gastos unya sa maong piniliay nga sumala pa niini mas maayong adto gamiton sa basic services sa katawhan inay sa umaabot nga piniliay sa barangay ug SK nga moabot sa duha ka bilyones pesos.

Apan kun si Del Mar adunay eksplinasyon sa pag-oktaba niini, ang kanhi mayor sa dakbayan ug maoy iyang kapares diha sa Kongreso nga si Osmeña buot nga madayon gyud ang eleksyon.

Sumala pa ni Osmeña nga daghang mga barangay officials karon nga iyang nakitang walay mga gamit ug dili makamao sa ilang mga trabaho human mahatagan og mandato sa ilang mga konstituwente.

Gawas sa duha, ang pipila ka mga Sugbuanong kongresista aduna say managlahing mga baruganan. (BANAT NEWS)