'Mastermind' pagpatay sa negosyante sa Carcar nadakpan sud hospital

CEBU, Philippines - Gitumbok nga mastermind sa pagpapatay sa negosyante og motorsiklo niadtong Hulyo 12 didto sa Poblacion Uno sa dakbayan sa Carcar nadakpan sa kapolisan sa Theft and Robbery Section (TRS) sa Cebu City Police Office kagahapon sa alas-2 sa hapon sulod sa Chung Hua hospital human nagpa check-up sa iyang operasyon sa walang paa. Ang nasikop sa TRS nga gipangulohan ni Sr. Insp. Bonifacio Garciano mao si Jay Camotes Regis taga Poblacion uno sa dakbayan sa Carcar

Si Garciano sa pakighinabi sa mga tigbalita nagkanayon nga ilang gisikop si Camotes pinasikad sa Warrant of Arrest sa kasong Resistance and Disobedience to an Agent of Person in Authority nga giisyu ni Judge Grace Ipil sa dakbayan sa Carcar.

Ang mga kauban ni Camotes nga giapil pagdakop mao sila si Niel Allawan, 38; Wilfredo Baring, 53; Randolf Paninsoro, 31; ug ang giingong uyab ni Camotes nga si Faisa Dahi, 20.

Matud ni Garciano niadto pang Miyerkules nila giatangan sa Chung Hua si Camotes human sila makadawat og impormasyon nga magpa check-up kini tungod kay giingong naunay kini sa iyang armas nga .9mm.

Si Camotes mihimakak nga siya naunay sa armas kondili nadisgrasya ra kini hinungdan sa pagkabali sa iyang paa.

Si Dahi giingong mihatag dayon sa bag niini ngadto kang Camotes dihang nakamatikod nga dunay mga polis. Ang bag adunay .9mm pistol, dunay duha ka magazine nga puno sa bala, usa ka bulto nga gituuhang ang sulod shabu ug upat ka lain-laing klase sa cellphone.

Matud ni Garciano nga level two drug pusher sa dakbayan sa Carcar si Camotes base sa listahan sa PDEA ug ingon man sa PIB ug CIB.

Si Sr. Supt. Erson Digal, hepe sa kapolisan sa lalawigan kinsa personal nga mibisita sa TRS kagahapon mitug-an nga ilang gilakip sa pagpasaka og kasong murder si Camotes sanglit gitumbok kini nga maoy mastermind sa pagpapatay kang Eric Uraca nga usa ka negosyante og spare parts sa motorsiklo.

Si Uraca gipusil patay niadtong Hulyo 12 sa gabii atubangan sa iyang tindahan samtang nagkugos pa sa iyang anak niadtong higayona, gidemalas ang gun for hire nga sila si Ronilo Montalla ug Lupe Gicale, human maapsi.

Si Montalla ug Gicale mitug-an nga gi-hire ra sila sa usa ka Rey Llanos aron ipapatay si Uraca bugti sa P15 nga bayad niini. Si Llanos nadakpan usab sa follow-up sa kapolisan ug mitug-an nga igo ra siyang gisugo ni Camotes aron sa pagpangita og tawo nga mopatay ug sila si Gicale ug Montalla maoy iyang gisugo.

Matud ni Digal nga napasaka na ang kaso sa miaging semana lakip si Camotes nga gitumbok nga mastermind.  – BANAT NEWS