Pag-endorsar ni Sanchez kang Montebon gikuwestiyon ni Sepulveda

CEBU, Philippines - Gikuwestiyon sa tigpamaba sa Kapitolyo nga si Rory Jon Sepulveda ang subling pag-endorse ni Bise Gob. Gregorio Sanchez sa giingong nag-AWOL (absence without official leave) nga kawani niini aron makabalik sa pagtrabaho sa Kapitolyo.

Matud pa ni Sepulveda nga ang kawani nga patrabahuon pag-usab ni Sanchez mao si Manuel Montebon, ang gikatahong casual employee sa Kapitolyo nga giingong gipatrabaho sa umahan ni Sanchez sa lungsod sa Tuburan.

Si Montebon nanggawas sa mga balita sulod sa pipila ka mga adlaw human kini sumala pa ni Sanchez gipugos ni Provincial Attorney Mariano Martinquilla aron motestigo batok kang Sanchez kabahin sa alegasyong gigamit sa bise gobernador ang mga kawani sa Kapitolyo aron motrabaho sa iyang umahan diha sa Tuburan. Kini giingong bugti nga makatrabaho kini sa Kapitolyo. Ang maong mga alegasyon gihimakak ni Sanchez ug mihulagway niini nga kabahin lamang sa pagpangharas ni Garcia sa iyang buhatan.

Sumala pa ni Sepulveda nga niadtong wala pa ang eleksyon sa bulan sa Mayo, si Montebon kauban sa laing unom ka mga kawani gibalhin sa pagpatrabaho ni Gob. Gwendolyn Garcia gikan sa buhatan ni Sanchez ngadto na sa Provincial Agriculture Office.

Apan sa unang adlaw sa pagsugod sa pagtrabaho sa bag-o niining assignment wala gyud kini mopakita hangtud nga gideklarar kining AWOL.

Apan iyaha nalang nasayran nga atol sa paghikay na sa pag-renew sa mga kontrata sa mga casual employees sa buhatan sa bise gobernador niadtong Hulyo 1 naapil ang pangalan ni Montebon sa mga buot niining i-endorso nga i-hire.

Si Sepulveda nagkanayon nga base sa gihimo karon ni Sanchez nagpakita lang kining walay kamatuoran ang pasangil sa bise gobernador batok kang Martinquilla sanglit si Sanchez man hinuon karon ang nag-endorsar kang Montebon.   – BANAT NEWS