Sanchez mopa-disbar kang Martinquilla kay namugos og testigo

CEBU, Philippines - Gitumbok ni Provincial Attorney Mariano Martinquilla nga si Vice Gov. Gregorio Sanchez nagtinguhang mopasaka og petisyon ngadto sa Integrated Bar of the Philippines kon IBP aron siya mapa-disbar tungod sa pag-impluwensya niya nga mo-execute of affidavit ang empleyado sa bise gobernador batok ni Sanchez.

Matud pa ni Martinquilla nga niadtong nakalabay’ng adlaw gisultihan siya ni Provincial board member John Peter Calderon nga si Sanchez naglaraw nga mopasaka og disbarment case batok kaniya.

Tungod sa giingong pagpugos ni Martinquilla sa usa ka Manuel Montebon nga driver ni Sanchez nga motestigos batok sa giingong pagpatrabaho sa bise gobernador sa iyang mga empleyado ngadto sa iyang kaugalingong farm sa lungsod sa Tuburan.

Si Martinquilla mihimakak nga gipugos niya si Montebon aron iduot sa iyang kaugalingong amo.

Iyang gitataw nga niadtong nakalabay’ng bulan, ang iyang classmate kaniadto sa grade 5 nga si Montebon miduol kaniya sa usa ka buwangan sa Tuburan ug nangutana kun may testigos bang nakapirma og affidavit sa kaso ni Capitol Consultant on Information Atty. Rory Jon Sepulveda batok kang Sanchez labot sa kontrobersiya sa umahan ni Sanchez sa Tuburan.

Dihang iyang giingnan nga walay affidavit sa testigos nga nakapirma, si Montebon maoy misugyot nga siya andam siyang mo-execute og affidavit sanglit wala na siya magtrabaho sa bise gobernador apan iya lang kining gitambagan nga i-refer na lamang kini kang Sepulveda.

Apan wala kini mohatag og cellphone number aron ma-contact kini sa buhatan sa gobernador ug wala na kini magpakita kaniya.

Si Martinquilla mihagit kang Sanchez nga ipadayon ang iyang planong pagpa-disbar kaniya tungod kay nasayod siyang wala siya manghilabot sa politikanhong panagbingkil nila ni Gob. Gwendolyn Garcia ug Sanchez.

Samtang si Sanchez miingon nga ang iyang kawani mismo ang mipahibalo kaniyang gihaylo siya ni Martinquilla nga mo-execute og affidavit batok kaniya bugti sa paghatag og trabaho diha sa Kapitolyo.

Kini ang hinungdan nga mohimo siya og lakang batok   sa abogado sa Kapitolyo.  – BANAT NEWS