3 barangay gi-ultimatum ni Gwen

CEBU, Philippines - Gihatagan sa Kapitolyo og laing 15 ka adlaw nga ultimatum ang tulo ka mga barangay kapitan sa lungsod sa Tuburan nga giingong wala makaduso og liquidation papers sa minilyong pundo nga gihatag kanila alang sa asphalting ug road opening projects sa ilang mga barangay.

Matud pa ni Capitol Consultant on Information Atty. Rory Jon Sepulveda nga napupos na unta ang unang ultimatum niadtong Hulyo 30 apan gilugwayan ni Gob. Gwendolyn Garcia og laing 15 ka adlaw ang mga barangay officials base usab sa rekomendasyon sa Provincial Attorneys Office.

Ang gihatagan og paskin sa Kapitolyo mao ang barangay Tumogpa, barangay Kalangahan ug barangay Kalamansi sa lungsod sa Tuburan nga nahatagan og pundo alang sa road asphalting ug road opening project niadtong nakalabay nga tuig.

Matud pa ni Sepulveda nga si Provincial Attorney Mariano Martinquilla maoy misugyot nga hatagan pa og 15 ka adlaw nga lugway ang maong mga barangay gikan sa pagkadawat sa notisya.

Sa higayon nga mapakyas gihapon kini sa paghatag og liquidation, si Sepulveda nagkanayon nga ang gobernadora mohimo na og legal nga lakang batok sa mga barangay officials.

Nasayran nga ang maong mga barangay suod kaayo ni Bise Gob. Gregorio Sanchez hinungdan nga ang bise gobernador miakusar nga ang maong lakang usa ka matang sa pagpangharas sa iyang mga supporters sa maong mga barangay nga diin napildi ang gobernadora niadtong miaging eleksyon.

Si Sepulveda kusganon hinuong mihimakak sa maong pasangil ug pagduda ni Sanchez.   (BANATNEWS)