OFW gidudahang gipatay sa Kuwait

CEBU, Philippines - Hustisya ang gisinggit sa pamilya sa Sugbuanong Overseas Filipino Worker kansang patay’ng lawas miabot kagahapon gikan sa nasud sa Kuwait tungod kay nagduda silang gipatay kini sa iyang agalon ug dili sa atake sa sakit sa kasingkasing.

Ang pamilya ni Denise Colleen Sta. Cruz Faburada Bulay-og, 28, alyas Sugar lumad sa Banawa, Guadalupe dakbayan sa Sugbu ug adunay duha ka mga anak nagbangutan karon sa gidangatan niini.

Si Cristine Sta. Cruz (inahan ni Sugar) mipadayag nga dili sila makatuong giatake sa kasingkasing ang iyang anak human niya makita ang patay’ng lawas nga daghan og bun-og.

Gawas sa mga bun-og sa kalawasan duna usab kini daw dakong samad nga gihiwa diha sa baba padulong sa liog lahos ngadto na sa tiyan sa anak nga nakapaduda kanila og maayo.

Si Sugar mibiya niadtong Marso tuig 2008 ngadto sa nasud sa Kuwait ug nagserbisyo sa usa ka pamilyang Lebanese apan sa milabay’ng Enero 2009 milayas kini sa iyang amo gumikan sa pagmaltrato.

Mireklamo si Sugar sa inahan nga wala siya sweldohi sa iyang amo, kulang sa pagkaon, prisuhon kung molakaw ang iyang amo ug kung init ang panahon sa Kuwait dad-on kini ngadto sa Lebanon sa igsuon sa asawa sa iyang amo.

Sumala pa niini didto sa Lebanon gimaltrato usab siya ug gimolestiya apan wala mabutyag kun si kinsa ang mimolestiya kaniya.

Kini maoy hinungdan nga nakahukom kining molayas ug midangop sa mga Pilipino nga iyang nakaila ug sulod sa usa ka tuig kapin nga pagtago-tago ang mga Pilipino ra usab ang maghatagan kaniya og pagkaon ug ginagmay’ng trabaho aron makakwarta alang sa iyang pamilya dinhi sa Pilipinas.

Matud pa sa inahan wala modangop ang iyang anak (Sugar) sa Philippine Embassy sa Kuwait tungod sa kahadlok tungod kay daghang koneksiyon ang amo niini sa maong embahada ug sa Kuwaiti officials.

Misamot ang pagduda sa inahan nga gipanamastamasan ang anak pinaagi sa pag-torture gumikan kay giingong mitawag kanila ang agalon ni Sugar ug mibahad nga dili na kini makauli nga buhi sa Pilipinas tungod sa paglayas.

Gikatakda na untang mahilakip sa amnesty program si Sugar sa mga OFW nga nagtagotago sa nasud sa Kuwait apan kalit nga nasayran sa iyang mga higala nga patay na kini.

Mayo 14, 2010 dihang gipahibawo silang giatake sa sakit sa “cardiac arrest” sa usa ka tambalanan didto sa Kuwait si Sugar.

Gumikan niini mihangyo sila sa Malacañang pinaagi ni Executive Secretary Leandro Mendoza nga mabalik dinhi sa nasud bisan ang patay’ng lawas niini.

Ang patay’ng lawas ni Sugar gipaubos sa awtopsiya diha sa Rolling Hills aron pagtino sa kamatuoran sa kamatayon niini.

Bisan pa nga nadawat na sa ilang pamilya ang nahitabo ni Sugar apan nangayo gyud sila og hustisya ug eksplinasyon sa kamatayon niini.

Magbase unya sila sa resulta sa maong autopsy aron pagdangop sa gobiyerno aron ma-imbestigar ang maong kaso ug pagpangayo og hustisya ug pabayron ang mga tawong nalambigit sa kamatayon sa ilang anak. – BANAT NEWS